Weblog
Friday, 04 December 2009
-
2009年12月4日
今日有朋友問我可唔可以俾多次我個電話號碼佢。
聽完之後真係有點失望。
我肯定我之前俾過佢幾次...
如果PEOPLES果句「留住號碼留住關係」... 咁真係幾失望﹣我話，我會覺得失望。算啦，我知道訓一覺之後我就會唔再考究呢個問題。
不過我真係好想講：「我無刪除你嘅電話號碼，因為我唔知幾時有一日你會打黎。」
這刻，我是快樂王子。
Saturday, 28 November 2009
Thursday, 26 November 2009
-
2009年11月26日
好唔小心咁我尋日又病左喇。
我諗緊係唔係張被太保溫，保溫到有少少過熱而令到我出哂汗...繼而起解溫期間冷親而又病過。
至少，起我矇朧之中係有咁嘅印像。
都唔知係好事定壞事，但係張被真係太保暖，暖到我訓得唔係咁舒服。
（順帶一提，張被係呀媽新買嘅。）
通常病人都唔會認自己有病，所以我無食到藥就返左學（我係有諗過應唔應該帶D藥返學，不過只係諗下）
結果？PE堂愈黎愈唔對路（不過10球都拋到5球，19/25，巳經比平時好好好多）
Lunch time我終於後悔無帶到藥，想食都無得食。
但係之後做lab果陣我更後悔lunch time無買到藥，結果成個lab session都起頭暈暈同發冷情況之下做。
（成間lab得我一個纜埋頸巾都覺得凍，亦都好靜咁起度砌circuit）
終於頂到放學，即刻搭車返屋企，好想訓覺。
但係，我唔可以就咁大覺訓...
因為買左飛去聽藍奕邦。
可幸嘅係，食左兩粒藥再抖一抖之後個人無咩事，照去。
唔覺唔覺好快就完左，好好聽。
有D好想聽嘅歌反而無唱到（佢講完一段野我真係以為佢會唱《自知之明》）
場入面嘅聽眾好多都係接近30歲，有好多都係一對對咁去，不過都唔少好似我呢D咁嘅「獨行俠」
尋晚坐我前面有兩對情侶（一男三女，點分自己諗），右面又有一對情侶（又係成三十歲果D），至於我嘅左面？你可以估下坐左咩人，陣間話你知。
的確，有時自己一個人去聽音樂會、睇戲、do whatever you want都係一重享受（或者你所想做嘅野太冷門，無人有興趣）。雖然隔黎無人同你一齊分享果一刻嘅感受，但係可以有個空間俾自己一個人諗下野其實幾好。
整個Show因為起一個都幾細嘅地方進行（仲細過中學個hall），觀眾席係臨時搭建果隻，所以藍奕邦同聽眾嘅距離好近，不時搞下笑聊下聽眾，多一點Interaction，幾好幾好...
唔知你有無留意，成個場有三部琴（電子琴、鋼琴同古鍵琴），但係一張紙都無喎！
都唔知呢個藍奕邦咩結構，不單止無琴譜同歌紙，仲要咁多部琴都係一坐低就彈，又唔會彈錯或者唱錯果下先好野。
如果你俾另一個keyboard我打字，我都可能要時間熟習下...就算同樣係用緊自己部MacBook個keyboard都有機會打錯字。部琴上面咁多鍵仲要係一字排開佢都唔會彈錯，真係好野！
古鍵琴仲要係兩排...真係好多鍵！
用古鍵琴彈《奇珍異獸》同《快樂王子》係有另一種味...
呀，講返我隔黎坐左個咩人先（咦，定係你巳經忘記左想知呢樣野？）
當我行到上觀眾席，我心諗「噢...」
究竟呢個係「噢-2（陰上）」定係「噢-6（陽去）」呢？
成場氣氛都唔錯，有人打拍子有人跟住細細聲唱，而我就好安靜咁坐起度聽每一首歌。
突然之間我覺得好似起度搖晃緊﹣成排坐位都搖晃緊，就好似地震咁...
...而震央就係我左面個位（唔會再有另一個，因為得左面得返一個位）
起呢個時候，如果大家仲記得Physics堂學過D咩野... F = ma
你應該明白我當時個感覺係：「嘩嘩嘩，唔好亂黎...我唔想俾下面D鋼條插死」
好，你仲見到我有命返出黎打呢篇野，即係無事啦。
Monday, 23 November 2009
-
2009年11月23日
【關於我自己】
Woo, I missed you Mack...
最近有幾個諗法：
人地話一個人嘅名好重要，會好影響到果個人嘅性格同自專心... 同埋自覺存在。
我嘅中文名當然唔係自己選擇啦，姓氏呢樣野無得改，個名...可幸我唔地無跟咩族譜去排。
其實我都唔知如果跟族譜會點。
大學教左廣東話拼音，Hmm...其實我個名都唔係話好響。頭兩個字都係陽聲比較低沉，唯獨係個「軒」字係陰聲調，仲要係第一聲...
「呀軒」
其實好少人咁叫我。
中學之前，同你熟果個你會點叫佢？睇黎都係叫哂中文全名...
「莊浩文！」（呢個係我小學最friend嘅之一，不過升左中學巳經無聯絡）
上到中學，好快就會有一個屬於你嘅花名﹣呢個花名似乎都唔到你改。
「博！」（嘩，夠哂響。）
中學之後，似乎英文名呢樣野比較常用。就算熟嘅都係叫你花名...
「Mack」（因為我同人講我叫Mack，所以我就係Mack）
「洋蔥頭」
如果你同學知你中文全名，嘿...我諗你同佢都應該OK熟。
唔熟嘅人叫完你一聲Mack哥之後仲想佢點？幫手啦！Mack哥！
「Mack哥」
其實呢個名唔係好習慣。畢竟...我分分鐘細過佢。就算我大過佢，都唔係太習慣。
大概係因為香港人鐘意「兩個音節」，就好似「Mac」都要夾硬叫「Ｍac機」
「Ｍac機Mac機」「Mac Gay Mac Gay」噢！
有人叫我「Mack佬」，有人叫我「Mack仔」，呢兩個幾有趣，唔錯。
叫得出你個名其實巳經好好。起大學，有時有D同學仔行過，會咁樣互相recognize：
「;)」 “;)” （無聲）
「喂...」「哈...」
「Hi there」「Hello」
來不及說Bye巳經擦身而過。
又或者，你會多左幾個名
「呀Max，睇住。」
Softball入面最friend果個同學仔係咁叫我，但其實我都唔知點叫佢好...「呀龍」？其實到最後我都係「喂...同學仔...」
偶然，會有人叫我「Mark」，慣了。
起某一D場合，人地會咁叫你
「你係呀呀呀呀呀...粗腰個細佬」
。。。。。呢五個字就係我個名？
「細佬」
當然只有熟人會咁叫。
（其實上面咁大堆野我唔知自己想表達D咩）
我諗我太容易受影響。
今日Softball擊球考試，第一球差D打中呀sir，之後果幾球都失哂水準。
到尾果一兩球平定好先叫打得出去，激死。
唔太識企硬自己立場係我弱點之一
今日搭電梯見到另一邊有個幾歲大嘅小朋友起梯口想踏上去，我即刻諗「噢，行錯路？」
但其實我根本無錯，條電梯真係向下行喎。
點解我要因為傍邊嘅人而影響到自己呢？
我話過唔想用呀爸嘅錢買電腦俾呀媽，end up我咪又係諗緊應該邊部機自己俾錢（我要買兩部機）
俾呀媽講得兩句我又諗又度。
最近諗左好耐，諗緊另一個問題。
無錯，又係「快樂王子」同「憂鬱小生」嘅問題。
到最後，睇後要唱返首《我太難被感動》
或者《獨行俠》會係所有野嘅總結。
還是留待其他人做吧！
我要繼續去搵我自己。
Saturday, 21 November 2009
-
2009年11月21日
整天也在聽藍奕邦
聽一隻《騷潮》嘅時間等同於由出門口去到中大。
聽得出用心寫用心唱嘅音樂，就算無咩宣傳都會有人買佢嘅專輯。
好多歌都係寫佢身邊發生嘅事或者佢對事件嘅睇法，有部份歌都幾有共鳴。
可能係暫時見過最少商業味嘅歌手。
